Urruñan, Ramuntxo Ibarburu laborariaren etxaldean
Luzaz komertziala izan eta, 2016an, Ramuntxo Ibarburu laborari instalatu da Urruñan : amesten zuen ofizioan lan egiten du, Kintoa xerriak eta Manex ardiak hazten ditu
Urruñan sortua, Ramuntxo Ibarburuk lan desberdinak egin zituen, laborantxan sartu aintzin.
2016an, familiaren etxe bat arraberritu zuen, etxeko lurrak, 10 hektara, baliatzen ditu, eta beste 20 hektara alokatzen ditu.
Sormarkekin aritzen da, Kintoa Xerria, eta Ossau Irati gasna.
Kintoa xerriak mendiko 3 parketan gizentzen ditu, eta 250 ardi ditu, buru beltz eta buru gorriak.
Aurten, lehen aldikotz, gasnatzen hasi da, lehen gasnak Maiatzan onduak izanen dira, jateko prest.
Instalazioa, lagunen sustenguarekin
Ramuntxo Ibarburuk obra ainitz egin ditu, lagunekin baterat : bordak konpondu, arditegia sortu, parkeak antolatu dituzte.
Gasnategia montatzeko, okasionezko materiala erretreta hartzen zuen laborari bati erosi dio.
Kintoa xerria, hazteko errexa
Kintoa sormarka aski berria da.
Hemengo laborariek lan handia egin dute, xerri horren berezitasunak ezagutarazteko.
Horrela, 2017an, Kintoa haragi freskoak sormarka izan zuen, eta 2019an, Kintoa xingarrak.
Kintoa xerria kasik galdu zen, eta azken 45 urte hauetan, laborari batzuek lortu dute arraza salbatzea.
Kintoa xerriak burua eta ipurdia beltzak ditu, belarriek begiak tapatzen dizkiote.
Ramuntxok xerriak 2 hektarako parkeetan, mendialdean, Galbarioan, atxikitzen ditu : estalgia dute, eta lekuan atxemaiten dituzten xixari, sustraiak eta belarra jaten dituzte, baita zerealak ere.
Ramuntxok xerri umeak sortzailen baten etxaldetik hartzen ditu, eta urte batez hazten ditu, eta ederrenak, bi urtez.
Kintoa xerrian, dena jaten da
Aski gizendua direlarik, Kintoa xerriak sormarkak finkatu duen Donibane Garaziko abere hiltegirat eramaiten ditu.
Hortik, xingar freskoak Aldudeko xingartegirat eramaiten ditu, gazituak dira, eta idortzen uzten ditu, 16-18 hilabetez.
Gelditzen den karkasa Senperen den atelier kolektibo batetarat eramaiten ditu : bertan pateak, muturkiak, odolkiak, eta haragia urinetan prestatzen ditu.
Kalitatea eta salmenta zuzena
Ramuntxo Ibarburu Idoki elkarteko kidea da : tokiko kabalekin lan egiten du, eta mozkinak zuzenki saltzen ditu.
Kalitatearen parioa eginez, bazekien mozkinak ongi eta errexki salduko zituela, eta 8 urte hauetan, bezero sare bat osatu du.
Ramuntxoren xerrikiak Larrunkoop dendetan salgai dira, Urruña, Ziburu eta Hendaian, baita Arruntzakoopen ere, Uztaritzen.
Ramuntxo merkatuetan atxemanen duzue, aste guziz, Urruñan (larunbatetan) eta Ziburun (igandetan).
Bestalde, etxaldetik zuzenki pasatzen ahal da (hobe aintzinetik deitzea) :
- Gapelu Xahar Baita, Biriatuko bidea, 2785 - Urruña
- 06 87 88 44 93
- mendiari@sfr.fr