Altxalili, barnekaldeko LGBTQIA+ jendea biltzen duen elkarte dinamikoa
ALTXALILI kolektiboa 2022an sortu da : Lapurdi, Nafarroa Behera eta Xiberoan bizi diren LGBTQIA+ pertsonak, hots heterosexualak ez diren jendeak biltzen ditu. Lesbiana, gay edota bisexualak diren jendeek libreki bizi nahi dute, direnak kukutu gabe
LGBTQIA+ aipatzen delarik, heterosexualak ez diren jendeen sexu orientazioetaz mintzatzen gara : lesbianak, gay edo homosexualak, bisexualak, transgeneroak, intersexualak edo asexualak.
Mundua mundu denetik, nortasun sexual aniztasuna bada, bainan usu, jendartearen pisuarengatik, erlijioaren debekuengatik, nortasun hori ez dute publikoki agertzen, "arazorik" ez izaiteko, baztertuak edo jujatuak ez izaiteko.
BEKATOROSAK liburua
Dom Campistron aldudarrak esperientzia pertsonala baliatuz, liburu ilustratua sortu du, 2021ean.
Liburuan, Nafarroa Behereko 7 pertsonen lekukotasunak biltzen ditu, lesbiana, gay edo bisexualak diren 24 eta 55 urte arteko gizon eta emazteen esprientzia,
Elkar argitaletxeak plazaratu duelarik, ainitzentzat askatzailea izan da : lehen aldikotz, barnekaldean bizi direnen ahotsa entzun da, familian eta bizi intimoan LGBT izaitea nola aipatu duten - edo ez, egunerokoan zer etzun duten, zer zailtasun izan duten kondatzen du.
Ainitzetan, sexu nortasuna libreki bizitzeko, gordeka ari dira, edo Euskal Herritik joan izan behar dute.
Dom Campistronek liburua leku desberdinetan aurkeztu du, eta ohartu da garaia zela gaia plaza publikoan agertzea.
Altxalili kolektiboa sortu dute
Lagun batzuekin, denak ez heterosexualak, 2022an Altxalili kolektiboa sortu dute, elkartzeko, mintzatzeko, eztabaidatzeko, eta elkar sustengatzeko.
2022ko Abenduan, Prefosta elkarteak LGBT gau berezia Atharratzen antolatu nahi baitzuen, Altxaliliek pentsatu dute kabaret giroko ikusgarri bat sortzea, euskaraz, antzerkia, musika, kantu eta bertsoaz uztartuz.
Horrela, 2023ko Urtarrilaren 21ean, Altxalili Show Xahoenian presentatu zuten, eta gaualdiak arrakasta ederra izan zuen, uste baino jende gehiago bilduz : BEKAT'UROS lehen gaualdia izan zen.
Ondotik, Altxalili Show ikusgarria hobetu dute, eta Euskal Herriko toki desberdinetan aurkeztu dute, Irisarrin (EHZ), Elizondon, Hendaian, edo Baionan.
BEKAT'UROS #2, Atharratzen, Apirilaren 20an
Bekat'Uros lehen gaualdiaren arrakastaren ondotik, Prefosta elkarteak erabaki du bigarren edizioa antolatzea : Apirilaren 20an ospatuko da, Atharratzen.
Jende gehiago biltzeko, bestaren eremua handituko dute : Prefosta elkartearen Xahoeniako karrika hetsiko dute, eta merkatu estaliaren plaza ere baliatuko dute.
Bazkari alaitua proposatuko da (erreserbatzeko mezu bat igorri : 07 67 34 31 31 zenbakirat).
Berrikuntzetan, "harrotasunen ibilaldia" Atharratzeko karriketan eginen dute, arratsalde erditsutan.
Ondotik, musika, kontzertuak eta Altxalili Show-a izanen dira.
Komunikatu eta informatu
Gaur egun, LGBTQIA+ mugimendua gehiago aipatzen bada ere, ez da ahantzi behar jazarpena eta homofobia badirela.
Erasoak, hitzez edo fisikoki, gehiegitan gertatzen dira, eta Altxalili kolektiboaren ustez, jendeak, gazteak eta helduak, familiak informatu behar direla garrantzitsua iduritzen zaio.
Norbaitek sexu nortasun ez heterosexuala baldin badu, ez badaki ingurukoekin nola aipatu, Altxalilik oroitarazten du ez dela bakarrik egon behar, eta hitzegiteko eta galdeak pausatzeko pertsona bat xekatu behar dela.
Familetan aipatzea, gazteekin, inportanta da ere : morala eta aurre-iritzietatik ateratzea, seme edo alabaren entzutea, ulertzea beti posible da, diren bezala onartuz.
LGBTQIA+ jendeak besteak bezalakoak dira, eta gure herrietan lasai bizi daitezen, denen izpiritu zabaltasuna eta errespetua ezinbestekoak dira.