Baionako Xingar Feriatik zuzenean : xingar lehiaketaren eguna
Apirilaren 4tik 7a arte, Baionako Xingar Feria ospatzen da : 561garren edizioan, datak aldatu dituzte, jende guttiago biltzeko nahian. Lehen eguna herrikoia da, xingar lehiaketarekin
Baionako Xingar Feria 1462tik antolatzen da.
Euskal Herri, Biarno eta Landesetan onduak ziren xingarrak Baionako Portutik saltzen eta exportatzen baitziren, Bazko asteburuan, Xingar Feria egiten zen.
Azken urte hauetan, bisitarien kopurua izigarri emendatu baita, Baionako hiriak erabaki du dataz aldatzea.
4 egunez, 18 xingar egile profesionalak Roland Barthes plazan elkartzen dira, xapito handi batean.
Etxeko xingar lehiaketa ederra
26 xingar presentatuak izan dira, beste urteetan baino guttiago, bainan ederrak, kalitatearen aldetik.
Lehen aldikotz, Irisarriko Ximun eta Xalbat Goity anaiek lehen saria irabazi dute : azken urte hauetan, lagunen artean, xerria hiltzen eta xerrikiak eta xingarrak prestatzen dituzte.
Bigarren saria : Aldudeko Marcel Hualdek bildu du.
Hirugarren saria, Biarnotik, Gerderest herriko Daniel Tailleur-ek ukan du.
Apainketaren saria, Urepeleko Amelie Etchepareri eman diote.