23. KORRIKA Baionan bukatuko da, Martxoaren 24ean !

KORRIKA ekitaldi erraldoi bezain herrikoia da : 11 egunez eta 10 gauez, milaka herritar bideetan txandakatzen dira, lekukoa eskuz esku pasarazteko.

Korrikak helburu desberdinak ditu : euskara bide guztietan agertzea, eta euskaltegietan euskara kurtsoak helduentzat antolatzen dituen AEK elkartearen sustengatzea, diru sartzea segurtatuz.

23. KORRIKAren azken kilometroak, Baionan

KORRIKA Lapurdin sartuko da Saratik, Martxoaren 24ean, goizeko 5etan. Hortik, Ahetze eta Miarritzerat joanen da, eta gero, Baionalderat.
Goizean, 30 bat kilometro eginen dira Baiona, Hiriburu eta Mugerren, eta azken kilometroa, AEKrena, Santizpirituko zubitik herriko etxeraino joanen da.

Baionako Herriko Etxeko balkoitik, lekukoaren barnean den mezua irakurriko du idatzi duen pertsonak, eta ekitaldia bukatuko da AEKren hitzartzearekin.
Ondotik, besta handia izanen da, Baiona Handian eta Baiona Ttipian.

Euskal giroa Baionan

Baionako karrikak jendez  eta euskaraz beteko dira, HARRO HERRI lemapean.

Hiru kontzertu gune antolatuko dira, Merkatu plazan, Patxa plazan, eta San Andres plazan.
Korrikalariek euskal taldeak entzuteko parada izanen dute : Ibil Bedi, frikun, Bilabal, Anje Duhalde, Xutik, Xiberoots, SFM, TOC, Haira, Zetkin, Nakar, Kuma No Motor, AKTS...
Karriketan, musika taldeak ere ibiliko dira, Kuxkuxtu, Ixtaklok, Patxi eta Konpainia, Topatopia Batukada, Patxaranga...

Roland Barthes plazan, Euskal Herriko Laborantza Ganbarak sasi ardi zikiroa segurtatuko du (txartelak HEMEN salgai).
Plaza berean, Haurren Xokoan, Bernat Etxepare lizeoko ikasleek, Oreka zirko eskolak eta GAIA elkarteak animazioak proposatuko dituzte, eta arratsaldeko 4etan, PONTX Pailazoak "Gelara" ikusgarri berria aurkeztuko du.

KORRIKAren azken eguna : informazio praktikoak

Euskal Herriko xoko guztietatik etorriko diren autoak Ametzondoko aparkalekuan bilduko dira, eta Ametzondotik Baionaraino, joan jinak eginen dituzten autobusak 15 minuta guziz abiatuko dira.

Egun osoan zehar, TXIK TXAK sareko T1 eta T2 lineak ibiliko dira, 0:30ak arte.
Hendaiatik etorriko direnentzat, L3 linea hartu beharko da.

Orotarat, 800 laguntzaile Korrikaren azken egunean mobilizatuak izanen dira, eta lan txanda batzu oraindik bete behar dira : interesatuak bazarete, harremanetan sar zaitezte KORRIKArekin.