Robert Larrandaburu "Pipas" : Xiberoan VTT ibilbideak prestatzen dituzte

Robert Larrandaburu goi mendizalea da, eta Xiberoako ospetsuena !
Gaztetik Xiberoan ibiltzen da, berantago goi mendian ibiltzen hasi zen lagun batzuekin, eta zaletasun hunek mendi gorenenetarat eraman du.
8000 metro baino gehiagoko altuera duten 3 gailur igo ditu : Gasherbrum II (8035 m), Shishapangma (8027 m) eta munduko gorena, Everest (8849) m).
Everest igo zuen Fred Lafittekin baterat, 2002ko Maiatzaren 17an.
Euskal Herriko Mendizaleen Federazioko kidea da.

Robert Larrandaburuk lotura estua du goi mendiarekin, gaur egun mendi gida da, eta VTT erakaslea ere.
Lagun taldeendako mendi egonaldiak antolatzen ditu, Pirineoetan, Marokon edo Nepalen.

Mendia oinez edo VTTz gozatu

Robertek liburu desberdinak idatzi ditu, azkena "Xiberoako Xendak" (SUA argitaletxean) : hontan, 59 ibilbide eta 35 gailur aipatzen ditu.

VTT erakaslea izanik, azken hilabete hauetan, lan berezi bat betetzen du, Herrien elkargoarekin baterat, Xiberoako mendiko bizikleta ibilbideak definitzeko eta antolatzeko.

Mendiz mendi ibiltzen da, bizikletez, bide segurrak begiztatzeko, eta puliko zabalarentzat behar den bezala seinalatzeko.
Skian egiten den bezala, zailtasun mailak definituko dituzte, errexenetik zailenaraino.
Lehen ibilbideak udazkenean estreinatuko dituzte.

Laster, beste liburu bat aterako du : "Atlantikotik Mediterraneoaraino VTTz".