KORRONTZI Urruñan, Martxoaren 17an, ikastolen alde

Urruñako ikastola 1995ean sortu zen, 2001etik gaurko egoitzan kokatua dago, eta 2011an, handitu zuten.
Gaur egun 90 bat familia biltzen ditu, eta 110 bat haur.

Piarres Larzabal kolegioa Ziburun dago, aurten 20 urte betetzen ditu.
Seaskak ideki zuen bigarren kolegioa zen, Kanboko Xalbador kolegioaz gain. Gaur egun Seaskak 5 kolegio ditu.

Urte guziz, ikastoletako Besta taldeko burasoek kontzertu handi bat antolatzen dute, ikastolen alde.
Gipuzkoa Goierriko ikastolek ekitaldia sustengatzen dute, Urruña eta Goierri arteko loturak aspalditik azkarrak baitira.

Korrontzi taldea zuzenean

Aurten, Urruñako ikastola eta Piarres Larzabal kolegioaren alde, Korrontzi kantuz ariko da.

Taldea 2004ean sortu zuen Agus BArandiaran trikitilariak.
Folk melodiak eta doinu herrikoiak nahasten dituzte, kutsu modernoa emanez.
Korrontzi Euskal Herrian famatua da, eta munduan zehar ibiltzen da ere, festibalez festibal.

Korrontzi taldeak aurten 20 urte betetzen ditu, joan den Abenduan "20" izeneko disko bikoitza atera dute, lagun ainitz gomitatuz.

Urruñan, diskoa aurkeztuko dute, eta oholtzan, dantza talde bat ere ariko da.

Ikastoletako gazteak ere oholtzan

Ohitura den bezala, aurten ere Urruñako ikastola eta Ziburuko Piarres Larzabal kolegioko gazteek ekitaldian parte hartuko dute.
Azken aste hauetan, kantu, dantza eta musika errepikak antolatu dituzte, eta kontzertuaren lehen partea segurtatuko dute.

Hitzordua Urruñako Iturbidea gelan, Martxoaren 17an, igande arratsaldeko 4etan.
Kontzertuaren ondotik, talo jatea eta erromeria, Kuxkuxtu Txarangak alaiturik.

Txartelak aintzinetik salgai dira, 12 eurotan, Pausuko Xaia ostatuan eta Urruñako Dongaitz trinketean.
Kontzertuaren sartzean, txartelak 15 eurotan salduko dira.