Navighendu annantu à u web : Lasagni è Maccaroni
Navighendu annantu à u web, marcuri chì veni, u 6 di ghjinnaghju, pà Pasqua Pifania, sareti parechji com’è tutti l’anni à ramintacci cù piacè stu bellu pruverbiu : « À chì ùn manghja lasagne in Pasqua Pifania, tuttu l’annu si lagna. »
Quant’à mè, annu, ùn n’emu micca magnatu abbastanza lasagni chì cù tuttu ciò chì ci hè accadutu trà u Covid è tuttu u restu, c’era da lagnassi da Capu d’Annu à Natali ! Spiremu di cori chì u 2021 sarà bellu più filici cà l’annata scorsa : tandu, o cari, u ghjornu di Pasqua Pifania : tichjemuci à lasagni !
Ghjustappuntu, parlendu di lasagni, vogliu principià st’annu novu cuntenduvi a storia di Micah Laplante, un americanu chì hà fattu a scumessa di fabricà un ordinatori cù vechji cumpunenti infurmatichi, lasagni è rigatoni !
Da fà tena tutti l’elementi trà d’elli, ci hà missu appena d’incolla calda, un pocu di scotch isulanti è da ch’ellu s’assumigli à un veru bellu piattu di lasagni : a so pittura rossa chì pari salza !
Una maraviglia ch’ellu hà battizatu : Pasta PC !
Pà veda s’ellu viaghjava, l’hà imbrancatu à a televisiò…
È ancu s’ellu hà lintatu dopu à una stundetta, ci vò à dì ch’ellu t’hà avutu u tempu di fà una mansa d’affari posta ch’ellu ci hà missu un navigatori, Netflix, ch’ellu hà ghjucatu à Rocket League è ch’ellu hà ancu fighjulatu i so filmetti annantu à Youtube ! Chì putenza !
Cù matiriali novu è di qualità, sicura ch’ellu saria statu un veru ordinatori è ch’ellu avaria funziunatu quant’è l’altri chì t’ani più plasticu cà pasta !
Attenti chì Apple ùn si pigliessi l’idea è chì di i so Mac ùn ni fessi MacCaroni !
Épisodes
Tous les épisodes
Navighendu annantu à u web
Les plus écoutés de France Bleu RCFM