Navighendu annantu à u web : Eu cantu!

Ma dipoi stu luni, ci hè una billissima nuvità : ogni ghjornu, com’è in l’imissioni Dite a Vostra purtata da l’amicu Ghjuvan Carlu, pudeti scopra un puema, una filastrocca o ancu una canzona ricacciata da u discu Eu Cantu arrighjistratu da l’associu Scola in Festa.

Eu Cantu hè un mazzulu di fiori zitillini cantati è letti cù tantu talentu da l’elevi di Scola in Festa è scritti di sicuru da Felì, u maestru Ghjuvan Teramu Rocchi, Petru Santucci è Ghjacumu Fusina. 

Annantu à a nostra paghjina Facebook, hè l’amicu Puppeppu, portabandera di Scola in Festa chì ci faci l’onori di prisintacci ogni ghjornu una criazioni in una bella infilmatella, un bellu clippu cù i parolli da leghja è l’illustrazioni di Battì. 

D’altrondi, v’invitu à scopra u situ scolainfesta.corsica da ritruvacci tutti l’infurmazioni chì cuncernani a struttura è po da telecaricà senza tricà a valisgetta pidagogica di u discu Eu Cantu chì t’hà un intaressu maiò in scola quant’è in casa cù parolli, accordi, traduzzioni, disegni, ritratti è filmetti in raportu cù u vucabulariu ma dinò i virsioni strumintali d’ogni titulu.

Pà compia, staremu à senta un pizzatellu di a canzona Inventà i culori letta da Puppeppu : 

• « I vulemu inventà i culori
• S’elli mancanu à mezu à i fiori
• S’elli ùn bastanu ad apre i cori
• I vulemu inventà i culori » 

Bravu ! È com’ellu dici Puppeppu : à prestu !