Masai: U prufessore d'Aschese

*I take a peace of chalk *

And i write on the blackboard….

Facia,  u mo prufessore d’Inglese, Monsieur Vinciguerra.

*I take a peace of chalk, * dicia Monsieur Vinciguerra.

Era u mo prufessore d’Inglese.

Ma era statu più in Ascu à pressu à e capre chè in Stratford Upon Avon à pressu à Shakespeare.

L’aghju vistu l’altru ghjornu in carrughju.

Inghjuncatu cum’un manicu di sporta, viaghjava à passetti cuntati fidighjendu per forza a punta di i so scarpi.

Hè invechjatu.

Ellu dicia cusì, sempre in principiu di corsu, girendu u spinu à a sala. È fendu ciò ch’ellu dicia : scrivia propiu nant’à u tavulone.

*I take a peace of chalk *

And i write on the blackboard….

*Frimicacci, ti vecu! *

Si girava di colpu è li tirava a creta in capu, à Frimicacci, calatu in fondu di a sala. Tò ! In fronte. Ghjera di segnu,  ùn lu mancava mai. À u muvimentu di e braccie, si vidia chì Monsieur Vinciguerra era praticu di e petrate dà un pughjale à un altru.

Frimicacci escia da u corsu d’Inglese incù un picculu curnochjulu in fronte.

Nè era fieru di i so curnochjuli.

À Monsieur Vinciguerra li scappava vulenteri u Corsu. Incù u Francese ùn era tantu di settimana.

*Frimicacci ! E dite in u nasu è u spiritu in Guargualè ! * *Interessati o sumerò ! *

*I write l’articulu on the blackboard. Chì leghji? *

*Innò micca “te blackboard”. *

The, the. Incù u pinzu di a lingua ch’affa *cca à mezu à i denti. *

*Bughju cecu inside. *

Dicia cusì Monsieur Vinciguerra.

U mo prufessore…d’Aschese.