Masai: Sordu è felice

Ma sai chì prumettia d’esse una ghjurnata cum’è l’altre, eri mane quand’eo sò isciutu da casa mea per andà à travaglià. Ma, traversendu a Piazza Porta d’Arme di u Diamante, aghju cruciatu à  José María Fandango de Cinco Colonna y San Ghisè, un supportadore di u Gazelec Sporting di Cugnoli-l’Appicciu. Un amicone. Hà principiatu à parlami.

Issa parlata, m’hà accertatu una cosa di a quale mi era avvistu da tempu: sò mezu sordu. Ùn hè solu perchì i so prupositi mi davanu fastidiu, ch’eo sentia pocu è micca. Sò cum’è voi, pianu pianu, à unu a unu, l’angranaggi di a mo mecanica metabbolica si mettenu à faticà. Ghjè cusì per l’uditu. Furtuna, a tecnulugia, ch’ùn si vede ma chì agisce, vene à succore l’organi ch’ùn ne ponu più. Ghjè cusì per l’uditu. Aghju accicci eletronochi ficcati in l’arechje. Ghjè curiosa. Cun quessi, sentu ancu rimori ch’eo ùn sentia micca prima. Megliu, rimori ch’eo ùn sapia. Sentu troppu. Sentu nantu à u sulaghju e zampate di u misgiu chì s’avvicina. Sentu u mo blue-jean un centimetru troppu longu, chì strufina nant’à e tumette, quand’eo viaghju. Sentu a pulluzione sonore prudutta da a parlata di qualchissia chì mi da capu: rimori di lingua, di denti chi incappanu, di manselle chì scroccanu, di labbre umide chì si staccanu in un frusciu limicosu. Tutti soni chì parasiteghjanu u mo intendimentu è mi facenu piglià per un scemu, quandu u mio interlocutore si rende contu ch’ùn aghju capitu o ch’aghju capitu di traversu. Cumu li possu spiegà, ch’ùn hè micca per ch’eo ùn sentu ch’eo ùn aghju capitu, ma invece perch’eo sentu troppu, per ch’eo sentu e cunvulsioni di u so stomacu, mentre ch’ellu mi spieca a strategia di Popaul pè e senaturiali. Cumu li possi sipecà chì quand’ellu dice, ùn possu fà altru chè d’esse affascinatu da l’espressioni sonore di e so viscere. Ghjè cusì, di recula. Ma eri, furtuna, m’era scurdatu di mettemi l’audiofoni in l’arechje. Stava cum’è ingutuppatu in l’isulazione fonica d’un nulu di cutone.

Ma sai chì ghjè un gudimentu infinitu, d’un esse più agreditu da i soni di u mondu in generale è da i prupositi insignificanti è troppu longhi di José María Fandango de Cinco Colonna y San Ghisè.