Masai: Platano

A banana in spagnolu si dice « platano ». Ma più và è più in Spagna dicenu “banana”, pè a banana. U platanu, dicenu dinù “platano”. Ghjè una cosa da sapè: si unu in cor’ d’una ragiunata unu vi dumanda : “quieres platano”? Issa persona vi prupone, sia una banana, sia un arburu. Tuccherà à voi di capì segondu e circustenze di cos’ellu si tratta. U spagnolu hè tradimentosu, l’aghju sempre detta.

Issa cunversazione hè di ista mane. L’aghju intesa in caffè, pigliendu u caffè. Issu affare di banana u cuntava Lizy, una donna grassotta d’una cinquantina d’anni chì hà trè puntu sei di succheru in u sangue. Ghjera attavulinata in cumpagnia di u maritu, chì capighjava à mutesca à ogni volta chì a moglia parlava. Ùn mi ricordu più bè cum’ella hè venuta à parlà di “platano”. Forse perchì i dui cunsumadori matinali, appughjati à u bancu, vantavanu u football spagnolu chì manda e duie squatre madrilene in finale di a cuppa d’Europa. Iè, mi pare ch’ella s’hè intricciata cusì a discursata. Lizy hà intercetatu a palla è hà cappiatu a infrasata nant’à a banana spagnola, ch’ella tenia forse pronta da un pezzu, aspettendu a circustenza prupizia per pudella liberà. À i dui cunsumadori l’hà tagliatu a scicca è si sò stati zitti guardendu à Lizy.

Ghjè tandu chì u patrone hà sciaccatu, ridachjulendu, à a so cliente, prubbabilmente fidata, : « ùn mettite tandu zuccheru in u caffè o Lizy, cù u diabete chè v’avete… Senza, l’istatina chì vene puderia esse l’ultima per voi...” Antontò s’hè messu à ride, giallu, moltu più chì Lizy hà incarcatu u chjodu: “eo manghju è beiu cum’ella mi pare. Tantu issu zuccheru di merda ùn vole calà. Piglià u pigliu u trattamentu di Gliptina ch’ellu m’hà datu u duttore Belkhacem, ma aù...”

“Ma sè vo manghjavete di menu...” hà insistutu u patrone di u caffè chì a cunniscia è a vulia fà inzergà... “Vi tichjate troppu o Lizy, hè  quessu l’affare...”. U maritu mutu capighjava sempre. U caffitteru i fidighjava tremindui, ridoni. Sentia chì a macagna pigliava.

A donna grassotta hà datu una ochjata à u maritu è dopu à un picculu silenziu, hè scuppata. Cum’è previstu. “È chì hai tù o Antontò à dì di sì? Chì hai...”

Mi sò arizzatu è sò partutu. U sonu acutu di i chjirli di a moglia diabetica pianu pianu calava, mentre ch’eo m’alluntanava....