Masai: Lunanismu rende sordu

Simu pochi, simu chjuchi, simu divisi, simu povari è simu salvatichi.

A Francia sana a sà, da poi a difusione di a seria nova di Mafiosa. Trà dui assassinati, cantemu canti magnifichi, manghjemu u figatellu è ci cuglimu à e femine nantu à i tavulini per falle runcà, vistu chì, in più, simu macisti. Nant’à u Forum di RCFM, certi criticheghjanu l’imagine negativa di a nostra isula, ch’hè data da a seria di Canal Plus. Hè ancu vera ch’elle si ponu cuntà e fole pusitive in i filmi. Finzioni, chì danu una imagine pusitiva di a Corsica : a vita di Pasquale Paoli, e notti di Pasquale Paoli, a surella di Pasquale Paoli, Merusaglia in tempu di Pasquale Paoli. Ma peccatu, u fattu stà chì e legi di l’azardu ci ghjocanu contru. L’assassinati, ancu d’alti funziunarii, venenu à autentificà l’imagine trasgressiva di a Corsica di Mafiosa. Hà omu l’impressione chì u scenariu di a nostra vita vera è quellu di Mafiosa sò stati scritti da listessa manu.

Simu cum’è no simu è femula finita incù issa quistione d’imagine.

Simu chjuchi, simu pochi è simu dipendenti. Hè forse u nostru difettu principale. U reculamentu di e nostre grandi quistioni, dipendenu di vuluntà è di cumpetenze esterne à l’isula. Per u fattu, a malavita chì pruspereghja, ùn hè dopu, quand’o seremu autonomi o indipendenti, ghjè avà ch’o ùn simu micca.

Rompe a dipendenza, ghjè ancu sentesi cuncernati da i grandi prublema pianetarii, ghjè avè a pretensione d’un parè nant’à e grandi quistioni mundiali. A cumunità mundiale, si pò passà di u nostru avisu nant’à a crisa chì mette populi sani à tappettu, perchè no lasciemu e banche guvernà u mondu ? Pò fà l’ecunumia di a voce di a nostra isulella, à prupositu di l’equilibru eculogicu di a pianeta ? Noi, chì campemu à mezu à un mare impuzzichitu da a pulluzione.

Ci hè tanti sugetti chì si meritanu ch’omu metti u nasu fora. Hè vera chì, grattà u billicu di l’altri, ùn face nasce nisun piacè.

Allora, serebbi utile d’esce da issa permanente ricerca di sensualità identitaria.

Detta altrimente,  a prigiò di l’unanisimu, rende sordu à i lagni di u mondu è à i nostri propii.