masai: L'Islanda (2)

Cosa vi dicia digià, vennari passatu? U permafrost ? Vulete sapè ciò ch’ellu hè u permafrost ? L’ete pagata a tassa di l’audiovisivu, omancu ? A « redevance » sè vo preferite. U permafrost, ghjè a terra cutrata in permanenza, in i paesi nordinchi. Ùn ne pudete fà nunda di a terra, fora di sculiscià è truncavvi una anca.

Cosa diciamu ?

À, iè. I mei, per rigalu di Natale, m’anu mandatu à Javafankull. In Islanda. Javafankull, hè unu di i duiecentu vulcani di l’isula, duv’elli si mandanu trà d’elli, l’Islandesi, quandu qualcosa ùn và, quandu unu capputteghja ch’ùn ne pò più di grattà u permafrost per passassi i nervi. In Islanda, ùn ci hè nunda à fà, ùn ci hè nunda. Hè tuttu cutratu, hè sempre notte è ùn ci hè chè vulcani. Micca osterie, micca caffè, micca caboulot, micca carta U. Allora a ghjente scimisce è gratta u permafrost ghjurnate sane. Grattanu cum’è per piantà i fasgiuletti. Ma ùn si pò piantà nunda in u permafrost ch’hè tuttu cudratu. Allora, quandu grattà u permafrost ùn face più effettu, per calmà u scimitu, i so cumpaisani u mandanu à Javafankull. Custì campanu tutte l’anime perse di i scimiti di u parmafrost. Divendanu elfi è trolls.

N’hè ? N’hè ? Ne cunniscite assai radiu chì vi parlanu di u parmafrost, voi è po di l’elfi è di i trolls ? N’hè ? L’elfi è i trolls sò i spiriti di i figlioli chì l’Islandesi volenu piattà, perch’elli sò scimiti da u permafrost, perch’elli ne sò vergugnosi. A Javafankull diventanu invisivvili. Cum’è nimu ùn vede più e so merde, l’Islandesi sò tranquilli. Sò cusì issa ghjente, u mullizzu u piattanu sott’à i tappetti. Ma u mullizzu si vindicheghja : si a ghjente ùn li pò vede, l’elfi è i trolls, elli, a ghjente a vede. Allora i trolls entrenu in e casi, sguassanu tutti i filmi di i videodischi, cambianu tutte e serrature di a casa, alzanu a temperatura di u cungelatore per ch’elle strughjinu e salciccette, lampanu acquavita in a vasca di i pesci, si beienu a biera, piscianu in e buttiglie di sciampoing è d’after shave, danu un rendez-vous à e moglie à l’hotel La Villa  in Calvi, puntanu i mariti à corre à pressu à e vechje in carrughju, ridendu, incù un paghju di trisori in manu è per compie, forzanu a ghjente à manghjà brilluli incù u latte à tutti i ripasti**. **

Ùn vogliu micca esse un troll.

Ùn anderaghju micca à Javafankull.