Masai: L'e-zicaretta

I vecu fumà, mì, quelli chì anu abandunatu u tabaccu per l’e-zicaretta. I vecu, liberà u so fume biancu senza odore, angusciati da u penseru ligatu à u funziunamentu di issa mascina, chì nurmalamente li deve toglie a voglia di fumà tabaccu è cancellanne u piacè. U penseru ci hè in veru : digià, ci vole ch’elle ùn si scarchinu e batterie di u bucchinu eletronicu. Devenu fumà vicinu à una prisa qualunque, usb d’ordinatore o accendipippa d’una vittura. Dopu, ci hè bisognu à avè sempre à tiru u stucciu di l’ernesi, perchè u fumadore d’e-zicaretta passa u so tempu à avvità, svità, smuntà, rimunta u so accicciu, incù e so mani nerbose è l’ochji sburlati. Hè entratu in a cummunità di i pratichenti di issa mascina à fumà virtuale. Invece di guardà a televisione incù e moglie o i mariti, tranquilli, a sera,  i fumadori d’e-zigaretta s’adduniscenu per aquistà un arte più fine in l’usu di l’accicciu è si passanu un paghju d’ore inseme à avvità, svità, smuntà, rimuntà. È tenesi à currente di e nuvità. Devenu esse cumpetenti in u manighjà  issi prudutti chimichi incù u quale carcanu l’e-zicaretta. Arme chimiche, à  leghjene u nome. Afez El Assad, ci hè mancatu pocu ch’elli ùn lu bumbardessinu per quessa. Hà i baracconi pieni di carati di issu pruduttu, ch’hà tombu ùn sò quanta ghjente in i subborghi di Damascu. Quì si fuma. Allora ùn ci vole à sbagliassi in e dose, hè per ciò ch’elli s’adduniscenu. Inquieti, fideghjanu e so buttigline di pruduttu. A tichetta ùn la ponu leghje, hè scritta in serbo-cruatu classicu chì mancu in Belgradu ùn la parlanu più issa lingua.

Pratecanu u fumà virtuale per ùn esse più impastughjati da u tabaccu, ma in u so subcuscente, si sparghje u fume neru di u rimbeccu. Si dumandanu sì per cessà di fumà, ùn anu micca cedutu à a tentazione di Faustu, passendu un pattu incu u diavule. U fumadore d’e-zicaretta hè impiccatu à e forche d’una inquietutine prufonda.

Nervosu nervosu, suchja u so bucchinu eletronicu, dumandendusi quandu si inventerà qualcosa ch’ùn tomba.