Masai: A grande battaglia

L’orizonte eletturale hè in affaccu o ghjente. Pianu pianu, principianu à movesi e forze chì si metteranu in cumpetizione, ognuna per difende u soiu: u cunservatismu, u ritornu di a francisazione o a difesa di l’interessi di u Populu Corsu. Finalmente, a scelta pulitica si riduce à isse trè famiglie. Vinceranu quelli chì averanu a miglior’ prupensione à unissi.

In u campu di u Populu Corsu è di a so capacità à autodeterminassi, emu da vede si i partiti riesceranu à svucerdà a nostra storia, ch’hà sempre vistu a vittoria di a divisione. Sempre. Ghjè u sindromu di “Corsica non avrai mai bene”. Serà propiu quessa, a prova chì s’annunzia in e prussime battaglie eletturali: riesce à dà a priorità à l’interessu supranu di a Corsica, nant’à quellu subbalternu di e cappelle. In fatti, permette una espressione chjara di a vuluntà pupulare.

Intantu, i nostri guai ùn finiscenu mai. L’ultimu periculu, si chjama xylella fastidiosa. Ghjè un bateriu, suminatu da un insettu nant’à l’alivi è chì ruvina tuttu. L’ete intesa eri nant’à RCFM: Eliana Parigi hà sevutatu una delegazione Corsa in u meziornu di l’Italia, duv’ellu hè natu u scempiu in l’aliveti. Per avà, in Corsica ùn si serebbi ancu à vede, issa xylella fastidiosa. Ma s’omu ùn impetta l’entrata di vegetali putenzialmente infettati, simu belli.

In più di Manuel Valls, e bandere pruibbite, Thiriez, u cinips, a sicchia, morta-a-lingua-mortu-uupopulu, l’Etat Ismalique, ùn ci mancava più chè quessa. A xylella fastidiosa.

Impettemu issu bateriu di noce. S’ellu entre in Corsica, hà da suminà a ruvina ancu in a pulitica.  A sapete avà chì a xylella fastidiosa ùn si nutrisce ma chè in l’ambienti pulitichi i più attivi, è i si dissuchja.