Masai: A filusufia à u baccu

Ma issa filusufia à u baccu, chì casticu n’hè?  M’ete capitu i sugetti...

Micca chì, “camperemu per esse felici?”, ghjè una dumanda d’ognunu. In fatti a dumanda vera, piatta d’aretu à u sugettu di u baccu, serebbi: “perchè simu, invece d’ùn esse micca?”.

Ma Petrudumenicu o Karima, à sedeci anni, ùn si primureghjanu nè di u perchè nè di u cumu di a vita. Campanu à straziera una adulescenza in u cunflittu permanente incù i genitori è i vechji in generale, fendu sforzi sprupusitati per ùn assumigliassi à elli. A vita di issi zitelloni? Usci sbattuti, brame di ricusu di a civiltà chì l’hà fatti. Ma ch’ùn l’hà finiti. Gridi di rivolta, contr’à una sucietà ch’ùn i ricunnosce tale ch’elli sò, perchì –ghjustamente- li face u rimproveru d’esse incumpiuti. Ghjè purtantu a forza di l’adulescenza, issu veranu di a vita chì sbuccia in mille disordini, in un chaos chì annunzia l’ordine futuru di quand’elli seranu maturi. Di quand’elli seranu finiti.

È li vulete parlà di felicità? Ma u veranu di l’adulescenza ùn si pone a quistione di a felicità, ghjè una battaglia. D’aretu à l’estetica di l’epica veranile, ci hè a guerra di a vita.

“Camperemu per esse felici ?”, chì risposta si pò dà à sedeci anni, à una simile dumanda ? In più, quand’omu sà chì a felicità si campa propiu in l’istante chì passa. Quand’omu si n’avvede, di a felicità, ùn hè più presente, ghjè diventata un ricordu.

O allora, ci vole à amparà, incù e filusufie orientali, a sensazione di a sola stonda di vita vera, u presente. Faciule ùn hè, ma hè pussibbile, d’avè a cunscenza d’esse felici, pusati nant’una terrazza cun amici à beie u pastizzu, perch’omu hè statu capace di scurdassi di tuttu ciò ch’ùn hè u presente. A felicità ghjè dimentichera? È serà u scopu di a vita? Umbè... Si campa per ripruducesi, per generà altra ghjente, ch’averà dinù u compitu di fà figlioli. Ma, pruvendu di rende u mondu più bellu, vistu chè no simu umani, chè n’avemu una cuscenza è un affettu.

Allora, “Camperemu per esse felici” o no ? Campemu per fà issa guerra. Sì, cumbatte per quessa, ci rende felici, tandu sì.