Masai: Auguri pè u 2014

I v’hà fatti l’auguri di u guerrieru Masai Petruluigi Alessandri ? Allora i vi feraghju ancu eo. Cosa precacci d’altru per 2014, chè un veranu chì nasci è a s’allonghi in i nostri cori, in e nostre menti, in a nostra isula è in u mondu.

Tandu, tuccherà à e statine landane di fanne maturà e spighe.

In tantu, simu d’inguernu. Ci serebbinu u sugetti d’attualità chì accunsentenu di sparghje cummenti cum’è cunfettura nant’à u pane. Ma per principià issa seria nova di Masai, restemu in l’auguri.

In a tradizione in prima:

Bon’ dì è bon’ annu è bon’ capu d’annu

Pace  è salute per tuttu l’annu

Chì vo aghjite tantu granu Quantu petre in Sant'Appianu Chì vo aghjite tantu vinu Quantu cotule in San Gavinu

È signor’ Ciambellu inc’u so ghjocu

Ch’ellu a si piglie quellu locu Aurugi incù una fola per compie :

Ci hè un omettu tondulu, ind’una casuccia tondula, ch’hà qualcosa ch’ùn gira tondu. Mette a chjave tondula in u so chjavaghju tondulu, apre l’usciu tondulu è entre in a so casa tondula. Colla e scali tondule quattru à quattru, franca a porta tondula di a so camera tondula, apre u scagnu tondulu di a tavula di notte - tondula tondula-  è si mette à circà e chjavi tondule di a so vittura tondula. È cerca è cerca spasimendu è finisce per truvalle. Si ne và da a stanza tondula à u trapassu, capola e scali tondule, esce da a casa tondula è corre à a so vittura tondula. Apre a porta tondula, a sbatte nervosu, si posa d’aretu à u tondulu, ficca a chjave tondula, a gira.

Nunda. U mutore ùn s’accende.

È filica è filica cum’un scemu incù a chjave tondula in a incrichja di u cuntattu. Silenziu. A vittura ùn parte.

Allora, fiaccu, u murale à tappettu, appoghja u fronte nant’à u tondulu di a vittura tondula, chjode l’ochji è dice, murmurendu : « ci hè qualcosa ch’ùn squatra… ».