Un deiz, un den, ur vicher : Maryvonne Berthou, karget a embann (16)

Maryvonne Berthou, karget a embann e TES, Ti Embann ar Skolioù e Sant-Brieg. Savet oa bet ez vihan 'barzh un endro brezhoneg e Gwiseni. Pa oa krennardez he doa darempredet Oaled Sevenadurel ar Vro Bagan, e Plouneour-Traez. Eno he doa heuliet kentelioù brezhoneg, ouzhpenn reoù ar skolaj ha staget ganti mont d'ar festoù noz. Diwezhatoc'h e oa en em dommet ouzh ar c'hoariva brezhoneg. Se oa war dro 1975, gant Goulc'han Kervella. 

ⓘ Publicité

War ar vicher edukatourez e oa aet da gentañ. Hag hi dilezel al labour-se evit mont da labourat e brezhoneg gant Strollad ar Vro Bagan. E skeud-se he doa bet tro luskañ abadennoù kizidikaat war ar brezhoneg er skolioù kristen, gant Anna-Vari Arzur. A-benn ar fin e vezo skolaerez e Diwan 'doug ugent vloaz bennak. Graet ganti ur stummadur war micherioù an embann eo bremañ karget da brientiñ dafar ha teuliadoù pedagogel evit kount hentennoù an holl skolioù divyezhek kentañ derez.