Masai: Vizzavona, anni trenta

Stonde di mez’estate in Vizzavona. L’hotel hè immersu in batticcia di l’immensa  furesta di foi chì a si cumpetennu incù i larici à mezu à i quali qualchì castagnu a si face avvalè. Porta u nome di u Monte d’Oru sottu à u quale hè appullatu. Calatu in u salottu mi si pare d’esse in un filmu di Visconti. In issa sala, tuttu s’hè firmatu in u so decoru di l’anni trenta: a tapizzeria di i muri, a stofa di i futtogli è i sofà, a tinta di l’albe è l’albette, agganciate à porte è purtelli chì lascianu entre a luce verde di a furesta è sopratuttu, u sunadore di pianò. Hà una trinca Slavia è sona “Mazeppa, u quartu studiu d’esecuzione trascendante” di Franz Liszt. L’aghju sappiuta dopu, solu ùn l’averebbi trova**. ** Hè cuncentratu nant’à u strumentu, e dite volanu sopr’à u tastere. Trè giovani in short strappati, spettinati, longhi tirati nant’à i futtogli, venuti da un mondu aliene è imprubbabile quì, finiscenu purtantu per piglià una pusizione pusata, cacciassi l’auriculare di l’e-pad da l’arechja è stà à sente u pianò.****

Simu fora di u tempu in issa stanza à l’ambiente anacronicu di l’osteria di Vizzavona. A musica gallighjeghja in nuli dolci, corre in u salottu viscuntianu, cum’è fume di zicari. In fondu in fondu, luntanu, ci hè una porta, aperta nantu à l’altra banda. Ghjè un sas versu u mondu tempurale. Lascia fravvede l’imagini da culandi, ma senza u sonu chì li currisponde.  Aghju u core chi si strughje. Un vogliu ch’ellu finisca issu mumentu di grazia. Ghjè dilicatu, in periculu d’esse chjappu da a realità tempurale. Dura, dura, prutettu da sai sò cosa.

Ma in più bella, una donna forte, capellicorta, varca versu noi u sas di cambiamentu di dimensione, vene à  parlà à l arechja di u pianista chì si pianta di colpu di sunà. Tuttu svanisce.

Sona una campanella. Soca e fritelle sò pronte in u tempu d’oghje, in cucina.