Masai: A vita à l'aritrosa
Seria fundamentalmente diversa?
Si principia incù a morte. Vi sbarazzate subbitu di issa paura di a morte chì vi sevuta in vita sana. Prima si more. Dopu vi discitate in una casa di vechji, atturniatu di candele.
Cusì principia a vita à l’aritrosa.
V’avvidete chì, più và è megliu vi sentite. E votre pene si ne vanu, a tensione cala, u core ripiglia forza. L’artrosa, u colesterol vi lascianu tranquillu. Un bellu ghjornu vi rimpruvereghjanu d’esse troppu in salute, vi lampanu fora da a casa di vechji. Tuccate a vostra ritirata. Incù u passà di l’anni, site sempre più lestu. Eccuvi ghjuntu à u vostru ultimu ghjornu di travagliu. Ci hè una festa. I cullega v’atturnieghjanu, vi regalanu un rillogiu. A vostra paga hè alta.
Da u lindumane di a festa, principiate à francà pianu pianu quaranta dui anni è mezu di travagliu, falendu à unu à unu i scalini di a ierarchia, sin’à esse quellu ch’areca e tazzine di caffè à i titulari in funzione.
In u fratempu, i figliulini è i figlioli ingiuvaniscenu. A vostra moglia perturisce. Vi maritate, dopu fate a so cunniscenza à una terrazza di caffè. Passa una stonda. Rimarcate a civetteria di u sguardu di issa femina bruna, poi site solu in issa terrazza di caffè.
Ete u core strintu. Angoscia di a vita chì finisce incù a giuventù.
Vi passerà, chì avà site giovanu à bastanza per infine andà à i balli di paese. Organettu. Serate, pallò, custipole arrustite d’istatina, pulenda l’inguernu. Canzone. Cunniscite ùn sò quante femine, saltate cum’un caprettu.
Finiscenu i studii. Poi, liceo, cullegiu. Inglese prima lingua. Si fuma in i cabbinetti.
Ci ghjunghjimu : a scola in paese è u paradisu aspettatu di a zitellina.
Vi campate. Ghjucate à ciccia, à steccu. Currite pè e machje. Primu ghjornu di scola : pianghjite. Mamma vi manca. Tè, site una criatura. L’ultimi nove mesi di a vita à l’aritrosa, i passate in corpu à mamma, à gallu in u limicu. Rimori affugati vi ghjunghjenu da l’ar’ di fora. Inchjuculite. Site riduttu à una cuderzula chì si dà di rimenu, frenetica.
È a cumedia si finisce, in un orgasimu.
Dopu, u niente.