Masai: Viaghju settembrinu in Casamutz

Site digià andati in piazza à a gara diTimphù ? Timphù, a capitale di u Bhutan. Aiò, venite venite, ci femu un viaghju settembrinu in issu picculu paese di u Tibè trà l’India è a Cina.

Simu à quattru mila metri d’altitutine. Si secca di fretu. Ùn nasce un filu d’erba.

In piazza à a gara di Thimphù, ci hè una chjesa bleue. Ùn hè mancu una chjesa, una spezia di chjesa, incù rutuloni nantu à i quali sbandereghjanu stracci multiculori.  Giranu. U ventu cutratu, soffia in i stracci, face vulà e rote rosse arancione di l’omi capipilati chì correnu in tutti i sensi. Gridanu, si facenu mottu : « o Louis ti puzza ista mane ».

L’umani sò listessi in ogni locu, cridetemi puru.

Un fretu ...

Un nasce un filu d’erba ...

Di quandu in quandu si piantanu di corre d’avanti i issi rutuloni. Tandu, e rote rosse arancione si calmanu. A unu à unu, d’una puntata di manu, facenu girà u mulinu di e preghere –perchè sò mulini di preghere- è si pichjanu in pettu murmurendu « hè colpa mea, hè colpa mea ».

Mi sò avvicinatu, per dumandà à unu chì mi paria troppu grassu per issi lochi duv’ellu si pate a fame. Normalmente :

-        Ma hè colpa vostra, di cosa ?...

-        Umbè !  m’hà rispostu. È chì ne sò….

È u rutulone di e prighere girava, girava, è l’omu dicia “hè colpa mea, hè colpa mea », eo dumandava « di cosa, di cosa », ellu rispundia « ùn la sò, ùn la sò ».

Vicinu à a gara, ci hè una spezia di biomarcatu lucale duv’elli vendenu e mutz calle nant’à banchi di legnu. Calle è dunque umbule. Quand’elle sò ghjalate sò dure. Sò spezie di fritelle oliose impastate da e Bhutane (e donne di u Bhutan) incù a farina di…Infine, sai sò a farina ch’elli mettenu. Hè nera. E chjamanu cusì, e mutz. Sò u manghjà preferitu di Timphù è un elementu d’architettura. Quand’elle sò secche l’adopranu per fà i muri di e so case. V’assicurgu chì ghjè vera. N’hè natu u nome d’un paese, in a periferia di Thimphù: Casamutz. Ci hè ancu una università.

(Soffiu...) Chì addisperu....**