Masai: Ùn ci hè voglia di ride

Oghje per favvi ride, megliu serebbi di parlà di futebol. Di a crisa di sustegnu per l’echippa di Francia in Corsica. Supporter quì n’hè hà pochi è micca. Ferebbi ride. Ma ci hè di i ghjorni di crisa chì, ride diventa un lussu impussibbile. Purtantu u laziu ci hè di scaccanà, solu cinque minuti, per esse cum’è in un òasi senza futebol.

Eo qualcosa di prontu l’averebbi, per favvi ride. Ma ùn vale nunda, hè ropa frusta.

Ghjorni fà, ghjera à l’interru d’un omu riccu mensu. À mezu à a ghjente chì aspettava u so tornu per fà parte di duvere, ci era un tippu malvestutu, malconciu, micca rasatu. Paria un disgraziatu senza nè vitu nè allogiu. È pianghjia, adduluritu. L’aghju dumandatu : « site parente incù u mortu? ».  « innò », mi face, singhjuzzendu. « Ma perchè chì pianghjite tantu ?», l’aghju dettu.  « Propiu per quessa » m’hà rispostu…

In issi tempi di cuntrasti è di crisa cun Cazeneuve, chì i so antenati sò Corsi, chì serve a coppa e u casgiu vechju in i cocktails di u Ministeru di l’Internu, chì a prova ch’ellu hè Corsu hè chì ghjè francu, ùn ci hè tanta voglia di ride. In più, tutti issi scandali annerbanu, issi capizzoni chì ruspanu.... Purtantu, omu sà chì ùn sò i solli à rende felici: quandu un patrone di banca si more, hè interratu in una cascia di risparmiu, soca ? Benintesu i predicatori, elli ci dicenu sperate, sperate in u Paradisu è pregate. Da quassù, l’ochju di Mosca vi fideghja, allora fatevi vede divotu è serete elettu.  Quandu un prete malatu entre in ospidale, quand’ellu sorte, ùn hè curatu ? Più bella prova chì Diu esiste...

Avà, sè vo site ateu, vi resta u pastizzu. Beie, inturcavvi. Favvi pagà una turnata. Ma perchè aspettà d’esse di turnata? À l’andata ùn si pò beie ?

Innò, ùn vecu nunda chì vi possa fà ride oghje, cacciatuci u fattu chì l’echippa di Francia hè in quarti di finale di a Cuppa di u Mondu di futebol è Cazeneuve hè d’origine Corsa.

Per contu meo, mi n’enfuttu. À mè basta,

A ferina di Totò

I chjassi di Ficaghja

Un casgiu d’un chilò

È un cane ch’abbaghja