Masai: U techju ùn crede mai u famitu

Anu crisciutu i famiti. Face paura.  Sò guasi trè miliarde nantu à a Terra. Quand’eo dicu i famiti, vogliu intende quelli ch’ùn manghjanu per ch’elli sò disgraziati. Quelli chì, calati in terra,  vi guardanu fissi fissi incù issi ochji gialli, sgranati. Sapete, u sguardu chì vi s’infilza in corpu tantu chì, à u ripastu ghjustu dopu, ùn vi riservite micca i ravioli. Sò quessi i famiti. Guasi trè miliarde sò. Sciffre di a FAO. Ci hè da trimà. Simu novecentu milioni, noi i  techji. Ma quand’eo dicu techji, vogliu intende micca i ricconi, innò, ghjente cum’è voi, cum’è me, chì essendu in una relativa prusperità ci servimu duie volti in u testu di e lasagne incù u cignale à a stretta. Spendimu solli di a Securità Suciale -è tempu-, à sente i cunsigli vani di u dieteticu. Mettimu vestiti incù e righe in longu perchì u lardu ùn si veca troppu. È quandu, per furtuna, riescimu à levà una tordula, ùn cacciemu micca u tee shirt.

Viderete ch’un ghjornu i famiti n’anu da avè una techja. Ci attacheranu. Un ghjornu, isse trè miliarde di famiti anu da piglià d’assaltu u nostru mondu di i novecentu milioni di techji, incù mughji spaventosi, armati di cuchjaroni, di mescule è di frissoghje. Un ghjornu, i famiti scimiti da l’appitittu, anu da vene à lampà un ochju rabbiosu dentru à e nostre palelle.  Tandu seremu fritti.

Un seremu micca chjappi à l’ispensata. U Masai a vi averà detta. Ma micca solu. U quartu mondu ci averte ch’ellu hà da vene à cacà innù u nostru spazzatu.

Ma, chè vo sgiate, u techju ùn crede mai u famitu.