Masai: U singulare è l'universale

Biancu ghjentile , carcaghjolu , genuvese , murescula , aleaticu , minustellu, paga debbiti, riminese, brustianu, muntanaccia…

Cosa v’amentanu issi nomi ?

È s’aghjustu niellucciu , vermentinu è sciaccarellu  ?

Tandu vi vene. Sò i nomi di i capi di vigna di razza corsa.

Parlemune chì a vindemia ùn hè finita finita. Simu in l’attualità.

I vignaghjoli si movenu per salvalli, i razzini nustrali di a vigna. I capi di a vigna corsa, trovanu e so currispundenze in altre batticcie mediterranee. Per u fattu, u *vermentinu * si chjama cusì, tantu in Sardegna chè in Tuscana, u nostru niellucciu  diventa u san giovese in Tuscana è ne facenu Chianti. In quant’à u celebre cannonau sardu, rossu zeppu,  averà di siguru una currispundenza in Corsica. Dicenu ch’ellu seria u nostru barbarescu .

L’identità cumplessa di a nostra vigna, entre in una rete di parentia larga chì varca parechje sponde è ci piazza in un bacinu culturale di u quale emu interessu à rivendicacci.

I pastori, per contu soiu, si danu di rimenu per salvà u razzinu Corsu di a capra, resistente è pelilonga, i purcaghji quellu di i porci.

I pueta travaglianu à rende perennu un versu di puesia.

I muradori riflettenu per truvà u modu di sparghje l’arte di u muru à l’asseccu.

Perchè isse mosse in favore di a singularità, quandu certi ùn volenu sente parlà chè d’universale ? Fendu soia una nuzione storta di l’universale. Ind’è perchè chì, ci vole à resiste à a banalisazione mundialisata chì apparineghja tuttu. A mundialisazione di u manghjà è di u beie crea una uniformità di u manghjà e di u beie. Listessa uniformità, pè a mundialsazione di a musica, di u veste, di u scrive, di u parlà…

Tutti uguali, per certi vole dì tutti listessi. Ghjè quessa a pessima definizione d’un universalisimu sbagliatu.

L’universale, campatu invece cum’è a vita vera, unisce l’infinitutine di e nostre singularità, cum’è i baghi di a melingrana…