Masai: U polò, u steccu

In u polo, u più bonu hè u steccu. Ghjè ciò chì dura u più. Puderebbi ancu esse una bella matafura in pulitica. Vogliu amentà l’eletti.

Qualsiasi u postu elettivu, un elettu hè u rapresentante di u populu è solu quessa. Ghjè mandatu da l’elettori  per aministrà o fà legi.

À u primu mandatu, l’elettu hè cuntentu, si face avvalè a so leghjitimità eletturale. Ghjè prupiu un rapresentante di a pupulazione. Finisce u so mandatu è dopu si ripresenta. À u principiu di l’altru mandatu, hè sempre un rapresentante di a pupulazione, ma un pocu di menu. Pianu pianu hè imbuffatu di a so impurtanza. Si stalla. À a fine di u segondu mandatu, s’hè manghjatu u polò. Hè ghjuntu à u steccu. Tandu si n’averebbi d’andà. Ma innò. Muta pelu. Cambia. Pian’ pianinu ùn hè più u portavoce di quelli chì l’anu elettu, ma invece, intende dumandà à u populu d’accunciassi à i so prugetti. In corte parulle, à u terzu mandatu, inizia a so carriera di prufesiunale di a pulitica. U sò scopu permanente è unicu, cunsiste avà à fà cose chì l’accunsenteranu à esse rielettu in sempiternu è – megliu- à aricuvarassi altri mandati, stallendusi in issu modu, sin’à a fine di a so vita, in l’ulicarchia di a Republica. Per cacciallusi o cacciallasi di mezu, chì pò esse ancu femina, à l’elettori ci vole u criccu è propiu ch’ellu abbia fattu cacate tamante, scurdendusi ch’ellu hè un elettu. Praticamente, tale l’insettu ch’omu chjama « cantamessa », « cavallina », « ghjumenta di i frati » o « santamaddalena » (in Francese, « la mante religieuse »), ci vole ch’ellu si sia manghjatu u so populu eletturale, quellu chì l’hà impregnatu.  Bella cunfusione di sensi. L’amante religiosu. Si piglia per Dio. Chì spessu sò ancu pretini.

Issu discorsu hè per dì chì, più và è più sò, quelli chì sognanu à una altra Republica, chì volti à i fundamentali di a demucrazia. Una Republica in u senu di a quale, “elettu”, ùn sia più un mistieru, ma una funzione -è una solu-, chì durga è finisca.

Rivenendu à a metafura: quand’è t’ai finitu u polò, ùn ti suchji micca u steccu, u ghjetti.