Masai: U muntime di seca

Simu entrati in l’ultimu trattu d’una annata di merda.

Trà crisa, disocupazione, Manuel Valls, guerre è carnugli, a nostra mansa s’alza.

Noi Corsi, avemu una capacità sprupositata, una forza chì l’altri ùn anu: ghjè a nostra prupensione à muntacci a seca. Quessa ci salva. U muntime di seca, hè cum’una spezie di Valium ch’omu s’ingolle per ùn lasciassi mette à tappettu da a realità. A capite bè chì, tutta issa materia, puru s’ella ci face sperà fiori è canti di galli, sente in veru. Aspettendu i pampasgioli, ci vole à suppurtà.

Una bella lezzione di muntime di seca, a ci dà a cumunità di scienziati. L’archeologhi, Inglesi, Americani è Corsi, travaglianu inseme. Si tenenu caru ma, à tempu, ùn si ponu pate chì sò ghjelosi trà d’elli.

Sò umani cum’è noi.

Ognunu scava per contu soiu, cun cuchjarina è pinellu. Si cumunicheghjanu i risultati per Internet, à l’instante.

Simu in u Devonshire. L’Inglese in più bella tira un mughju di vittoria. Falendu à 50 metri sottuterra, hà scupertu pezzetti di cavu di ramu. Dopu analizati, hè ghjuntu à a conclusione chì l’antichi Britannichi avianu una rete nazionale di telefunu, digià 25.000 anni fà. U culleca di i Stati Uniti chì scavava in una piana di u Manitoba, leghjendu l’infurmazione nantu à u so schrenu, hà fattu una ghignaccia. S’hè rimessu à zappà cum’un scemu. À 100 metri sottu terra, dà una pinnellata è eccu chì trova pezzetti di cristallu.  Li ridia tuttu. Per ellu era chjara. Issi pezzi di cristallu, era ciò chì firmava di u sistema di fibbra ottica, ch’elli avianu digià l’antichi Americani. Ma 35 000 anni fà. Tè ! Pigliati què ! È manda a nutizia nantu à à telatica mundiale. Ghignaccia di i culleca è amichi.

Ulivieru Jehasse è i so studienti di l’Università di Corsica, eranu nantu à u terrenu, in Ficaghja. Filicavanu in un locu chì si chjama Filice Piana. Arrabiati, anu scavatu à 200 metri. È ùn a trovu nunda. Ma nunda nunda…Dopu à avè ragiunatu trà d’elli, ùn ci pudia esse chè una cunclusione è una solu.  55 000 anni fà, l’antichi Corsi avianu digià u telefunu cellulare…

Allora videte chì subbitu subbitu a vita hè bella.