Masai: U minutu cursofunu

Salute à tutti. Oghje cum’è l’altri ghjorni parlu per quelli chì anu sempre a scenza di capisce u Corsu. Per l’altri, mi dispiace. Vultate da quì à un paghju di minuti.

Eccu l’affare: fidighjendu un amicu pastore à l’ora di a munghjera, mi sò avvistu chì e so capre si facianu munghje sempre in listessu ordine. L’aghju dumandatu, cumu era, m’hà rispostu : « quessa, ognunu a sà chì e capre si facenu munghje in un ordine ch’ùn cambia mai ». Ognunu a sà, ognunu a sà, hè capita ognunu a sà, ma nisunu hè capace di danne una spiegazione. Ai asgiu à dì « ognunu sà chì e capre si facenu munghje in un ordine sempre listessu ». Si deve per obblicu aghjustà: « è nisunu nisunu sà perchè ».  Ma – è quì attenti simu in a ricerca fundamentale- sì nisunu sà perchè, si facenu munghje in un ordine sempre listessu, pensu chì e capre elle a sappianu. Dunque, a spiculazione sana, ghjè questa quì : « ognunu sà chì e capre si facenu munghje in un ordine sempre listessu, ma nisunu sà perchè. Si pensa chì e capre elle a sappianu ». Chjudite l’ancinelli.

Ci vole dunque à accunsete à issu pustulatu : e capre sanu cosi chì noi ùn pudemu sapè. Isse cosi sò incunnuscibbili pè u telespetatore mediu, sia puru u più grande tuttolucu ficca nasu di prima categuria, chì risponde à e votre dumande ancu senza chè vo e pongate, chì vi spieca tuttu tuttu tuttu tuttu. U misteru di e capre chì si facenu munghje in un ordine sempre listessu, quessu ùn la pò sapè.

Pigliemu u casu avà, di u Patre Gaston Pietri. Ghjè un sapientone, quasi quasi puderia entre in a catecuria di i tuttoluchi. Fate qualunque dumanda à Patre Gaston Pietri, viderete. Averà sempre una risposta. Dumandateli di e capre chì si facenu munghje in un ordine sempre simile. Dopu à un picculu silenziu vi dicerà : « ognunu sà chì e capre si facenu munghje in un ordine sempre listessu, ma nisunu hè capace di dì perchè. Pensu chì e capre elle a sappianu. È Dio». Centu per una chì, Prete Gaston Pietri vi rispunderà cusì.

Vi ringraziu per l’ascoltu. Quelli ch’ùn capiscenu u corsu ponu avà vultà à sente u postu.