Masai: A segregazione vuluntaria

Una segregazione diventerà accettabbile sì a so vittima ci accunsente ? Frà a ghjente chì si move nantu à issa quistione attuale di a nostra sucietà, ci hè a giurnalista è realisatrice Tunisina Nadia El Fani.  S’hè parlatu assai di u casu di issu giardinu di criature (una guarderia) di Montreal a u Quebec, induve a diretrice porta u niqab. Issa femina musulmana, ch’hà fattu studii di geniu civile, accerta chì, mettesi u niqab ghjè a so scelta è si deve rispettà.

Una scelta purtantu cuntestata : un hè perch’omu accunsente à una servitù, chì a servitù si face accettabbile.  Dice Nadia El Fani chì, quand’omu si sottumette à un simile diktat religiosu, a servitù ghjè segregazione sessuale ; è quand’omu a s’impone à di per sè, si face omu complice d’una segragazione. Ma micca solu di a so segregazione stessa, ma di a segregazione in generale, cum’è fattu di sucietà. Una educatrice in niqab, face sapè a i zitelli chì issa segregazione hè una scelta pussibbile.

A Tunisina face u parangone trà a servitù di isse donne musulmane è quella di i schiavi neri, in i Stati Uniti di a schiavitù Yankee. Ùn hè un ligame retoricu, s’omu truva, in i Stati Uniti di tandu, schiavi chì si sò cumpiaciuti in a so cundizione. In i campi di cutone ùn ci n’era, ma dentru à e case culoniche, si truvavanu donne chì ùn si cuntentavanu d’accettà a so schiavitù, ma eranu ancu pronte à difendela.

In « La Revue des deux mondes », ci hè un testu publicatu in u 1860 da u geografu francese Élisée RECLUS, intitulatu « *u codice neru è i schiavi * ». Lighjitelu sè vo u truvate. Per puntavvi à falla, eccu dui pezzi, sprupusitati, ch’eo vi lecu. S’aprenu l’ancinelli : « è si ne cita parechje, chì, viaghjendu incù e so maestre in i stati di u Nordu, un ferebbinu mancu per more un passu fora da e so stanze d’hotel, per ùn esse rapite da issi banditi spietati chì volenu impone a libertà à i schiavi  ». Un pocu più in dà, u testu dice, si cita sempre, « s’ella era liberata per forza, si murerebbi d’addisperu, dopu à avè girandulatu assai indornu à u cari muri chì l’avianu rinchjosa  ». Quì finisce a citazione.

U prugressu umanu ci insegna chì una servitù ùn si face micca tullerabbile di più, perchì certe vittime ci accunsentenu. U populu di i Stati Uniti hà decisu un bellu ghjornu chì a schiavitù è e so manifestazioni eranu fora di lege in u so mondu. U portu di u niqab, impostu à e donne musulmane è l’altre servitù vuluntarie, s’arrimbanu à issa regula di a liberazione.