Masai: Mi piace a passa in rugby 2

Aghju frenatu seccu, quand’eo sò ghjuntu à rente à u casale di Tagliarini, in piazza di u paese ind’è mè. Sò di Cugnoli-l’Appicciu. Iè chì u cunniscite. Ghjè in erta d’un pughjalettu di a Valle di a Solitutine.

Aghju frenatu seccu chì nant’à u muru, unu avia scrittu, prubbabbilmente di nuttata, in pinnellate nere è rabbiose: “Cugnoli-l’Appicciu, u paese di e sette funtane, mariti curnuti è moglie puttane”. Sò firmatu à bocca aperta. Chì sciambulone à i paisani. È po mi so dettu, eo ne sò francu di issu scandalu. Stò quì, ma ùn so micca di quì. Mancu a mo moglia. A so caccara paterna era di quì, hè vera. Ma u so caccaru nò. Era di Bologna. Ci entru solu per un quartu in l’eredità di u paese. Quasi nunda.

Quellu o quella ch’hà fattu issu tag, a connosce a legenda di u paese. L’antichi chì anu creatu à Cugnoli-l’Appicciu , ci anu vulsutu fà sette funtane. Perchè chì sette, ghjè un numeru simbolicu: i sette ghjorni di a Creazione, e sette chjappelle, i sette colpi, u magu à sette teste, e sette figliole di u Duttore March. Altru latu di a legenda: e donne di Cugnoli anu sempre avutu u diavule in corpu, ùn si sà perchè. Soca ci traghje un aria speciale, qual’hè chì sà. Oghje si dicerebbi ch’elle sò liberate.

Guardendu u tag, pensava: “furtuna ch’ùn simu di quì, di ceppu”. Cullemu solu in week end di quandu in quandu.

Ùn vi saperebbi dì cum’ellu hè finitu l’affare.

Bonu.

Avà ci vole eo ch’eo finisca issa cronaca, chì u tempu corre è avete altri affari à fà. Eo dinù.

In cunclusione, vi diceraghju issa frase di u saviu Chinese Lao Tseu...

...Avà ùn me ne ricordu più.

A vi diceraghju dumane.