Masai: Mi ci vulerebbinu cinque minuti
...Per esse inutile cum’un fulminente in a so scatula.
Mi ci vulerebbinu cinque minuti
Cinque minuti
Liberatu da e pastoghje di l’oghjincu
È guardà u mare arabbiatu
Batte nant’à i scogli di i Sanguinari
Solu cinque minuti
Per esse inutile cum’un fulminente in a so scatula
Cinque minuti
Cinque minuti solu
Per ponesi dumande senza risposta
Micca inutile
Attenti
Senza risposta
È lascià u mare arabbiatu
Arabiassi per nunda
Cinque minuti
Per pudessi dì
Tè
U mare hà i so cinque minuti
I so cinque minuti
Di sfocu vanu
Inutile
Ch’ùn aspetta nunda di issi scogli ch’ellu schiaffitteghja
Ma utile pè e triglie
Allignate
Profittanu di u ritimu reculare di l’azizume marinu
Per ballassi un madison di l’anni sessanta di u scorsu seculu
Cinque minuti
Basterebbinu cinque minuti
Per pisà u capu
Lascià e triglie è e so ballate passate di moda
U mare è u so sfocu sanguinare
Per purtà u sguardu versu cunfine senza oriente
È credesi liberu
Cinque minuti
Cinque minuti solu
Per ciuttami in u marosulu
A mezu à e triglie
Ridemi di issu madison d’eri
È pruponeli per ride
L’hip hop di oghje
S’elle ci credenu à issu ingannu
Cinque minuti
Mi basteranu cinque minuti solu
Per
Hip hop
Falle saltichjà in a palella
Ma quessa ùn sò s’ella accaderà
Hè un sognu micca un prugettu
In batticcia marina
Guardendu i scogli di i Sanguinari chì sudanu scuma bianca
Un si facenu prugetti
Solu sogni
Eo vulia cinque minuti
Cinque minuti è basta
Per cunfonde
Un sognu
È a realità