Masai: M'avanza un Vai è Fatti Futte

Mi ferma un “vai è fatti futte” è ùn sò cosa fanne...

M’avanza un “vai è fatti futte”, ci vuleria ch’eo u dia à qualchissia, ma à quale? Ci vole à sceglie bè. Per u fattu, ùn cunvene à porghje u “vai è fatti futte” à una persona ch’hè digià andata. Perchè chì, una volta và bè, duie diventa una abitutine.

Eri mane, in u mentre ch’eo pensava à quessa, Ghjuvanmichele Fraticelli, ochjisburlatu è voce alterata, mi parlava di u Big Bang, di l’universi multeplici di prima di u Big Bang, chì si sò ingrunchjati  sin’à diventà tamant’à una testa di puntarolu è chì dopu, tredici miliarde è mezu d’anni fà,  hè schiattatu è s’hè spartu, per creà u tempu è u spaziu induv’è no simu avà. Paria nafantatu da ciò ch’ellu dicia. A so voce si facia più acuta, un pocu cum’è quella di Ghjuvanni Chiorboli. Sudava parlendu di u muru di Planck chì si pò francà passentu in un tufunichju di vermu, per viaghjà in u tempu è in u spaziu di prima di u Big Bang.

Ma à chì fà? Quì ùn site bè? Serete megliu d’aretu à u muru di Planck, arrimbatu?

Fraticelli parlava parlava è più parlava è più era annerbatu. Chì sprupositi, dicia... È tandu, tacchi ! Li s’hè crepata a vena bleu è s’hè taciutu. S’hè firmatu mutu mutu, l’ochji aperti, cum’è stregatu.

Mi so dettu, tè, si pò viaghjà in u tempu è andà à fassi futte in altrò è à una altra epica.

Ne cunnoscu omancu dui chì, imbucchendusi in un tufunichju di vermu,  puderanu aduprà u “vai è fatti futte” chì m’avanza è andassine à falla in u tempu è in u spaziu. Parlu di quellu ch’ùn serà elettu merre d’Aiacciu è quill’altru chì viderà u serione di Presidente di u Cunsigliu Generale di u Cismonte passalli sottu à u nasu. Rispettu parlendu, benintesu. Micca chì, viaghjendu in u spaziu è in u trempu, si puderebbi ingiuvanisce. L’hà detta Fraticelli. Dunque, ciò ch’elli averanu fiascatu oghje è quì, a puderanu acquistà in altrò è dopu o prima.

Fraticelli m’hà datu a pena in capu. È à voi dinù, a sentu.

Mi vene in core quella di u gricciu ch’aghju incuntratu dumenica a mane in a machja d’arbiciu nant’à i fianchi di u Pignu. Issu gricciu era vechju vechju. S’era scurdatu di more. Quand’ellu si n’hè avvistu era troppu tardi.

Finalmente, u mio “vai è fatti futte” m’avanza sempre.

Soca ci vulerà ch’eo l’adopri à di per mè.