Masai: L'addisperati

Anu l’anima à fior’ di pelle

È u core chì si strughje

À leghje à mez’à e stelle

Una vita chì li fughje

Da i so pugni serrati

L’addisperati

Cercanu a ghjusta rima

À a so ghjusta versura

Quella d’a vita di prima

Di a so antica cultura

È per ciò sò malavviati

L’addisperati

À u so paradisu persu

Ùn li danu più e voci

Pian’ pianinu l’anu immersu

In u mare di e croci

Duve l’ochji sò serrati

L’addisperati

Anu l’unica cuscenza

Di a morte a furcuta

Neganu a permanenza

Di vita chì muca è muta

Ùn si volenu liberati

L’addisperati

Credenu in una verità

In i tempi d’una volta

Ogni cosa chì nasce avà

Ùn pò esse ropa colta

Incù i morti sò incamerati

L’addisperati

Insem’à elli fratelli

U presente ci morsica

Ma ùn ne femu spurtelli

Di e vincule di Corsica

Finimulu u currieru

À l’addisperu

Quand’una cosa si more

Eccu una altra pronta à nasce

Incù u listessu core

Stessa vita innù e fascie

Possanu esse liberati

L’addisperati

Di l’angoscia d’acqua bassa

E malincunie vane

U tempu chì sempre passa

A paura di dumane

È di i falsi curati

L’addisperati