Masai: Hà rottu u so telefunucciu

Ghjurnataccia. U so telefunucciu hè rottu. Hè rottu u so telefunucciu, oghje. Cum’è ind’è i filmetti di Tex Avery, hà un nulu neru sopra u capu chì a sevuta. Li piove à dossu. Hè sciappatu u so telefunucciu. Vitaccia per ella. Azizume. Ùn pò più parlà à u telefunucciu. Si sente sola. Aspetta tante telefunate. Eranu previste tante cunversazioni, longhe, u catrachinu appiccicatu à l’arechja, u sguardu persu in u viotu. A persona sana -i muvimenti, i gesti-, hè cumandata da u telefunuccciu insitatu nant’à l’arechja è a cunversazione chì, da l’arechja, li si ficca in capu. Quand’ella hè in casa, viaghja parlendu à u telefunucciu è ùn si n’à vede micca ch’ella viaghja. Parla à u telefunu è viaghja, senza cuntrullà a so mossa, senza sapè induv’ella và. Cum’una sunnambula. À la volti, senza ch’ellu ci sia una spiegazione raziunale, forse chì a parlata hà pigliatu un versu più acidu, tuttu parlendu, si mette à incurdà u passu da a cucina à a sala. Pianta un mezu segondu. È riparte, ma in camera, lentamente. Ghjè addulcitu un attimucciu u discorsu, capite. Ma dura pocu. A videte, risorte da a camera cum’una scema, francà l’appartamentu sanu battendu u taccu è và à perdesi in i canti i più landani di a casa, in un battitaccu chì cala, à tempu à a modulazione di a voce chì si face murmuru. Pace. Ma pianu pianu, u marosulu torna à ingunfià. Rivene, ineluttabile. Vi sbatte in faccia l’onda di a cunversazione chì passa, furiosa, senza areghjesi è finisce chjosa in cabinettu.

Ghjè un ballettu, areculatu da e tensioni chì carcanu e parulle barattate in u telefunucciu.

Ma oghje nò.

Hà rottu u so telefunucciu. Hà un nulu neru sopr’à u capu è li piove à dossu cum’è in un filmettu di Tex Avery.

Avà ci vole ch’ella trovi una ragiò à i so passi.