Masai: A felicità ghjè ind'è a carta U

Innò, mi sentenu e reni. Sò e reni chì mi sentenu è per ciò ch’eo sò sticchitu. Ùn sò micca sticchitu di natura. Fusse puru statu, omacaru… Di sicuru ch’eo sò andatu à vede u medicu.  M’hà dettu ch’avia i nudelli di a spinatoghja frusti per essemi ghjimbatu troppu. Dami i mo vintitrè euri è vai puru, m’hà dettu u mo medicu: per tè principia a falata eo ùn possu fà nunda. Allora aghju apertu u mo portafogliu per piglià a mo carte vitale. Ancu di grazia ch’eo l’aghju. Incù a carta vitale vi danu l’autorisazione di campà. Incù a carta murtale vi danu l’autorisazione di more. Hè tuttu organizatu. U mondu sanu invilia u sistema francese du cupertura suciale.

A sapete cum’eo mi sò avvistu ch’eo invechju. Quand’aghju guardatu a mo carta U in u portafogliu. Iè, aghju a carta U, eo. Vicinu à a carta U, ci era, bellu piegatu, u tichettu di cascia d’un tirasgiu speziale chì mi doppierà i punti, a prussima volta ch’eo a presenteraghju à a casciera. Tempi fà, l’averebbi ghjittatu issu tichettu. Ista volta l’aghju salvatu. Certi, Nicolas Hulot, u Cummandante Cousteau, anu bisognu di l’universu sanu per cuntene l’elementi di a so felicità. A mè, bastanu avà i sei centimetri quatrati di a mo carta U.

È tirati l’Ushuaia.

Aghju lasciatu una furtuna, in vinti anni, à u sceffu di a carta U. Mi ringrazia duppiendu i mo punti, da pudemi piglia, gratisi, una caffittera eletrica, in veru plasticu. Ghjè bravu. Ellu incù i mo solli s’hè fattu una casa à Monacò. Micca chì, ci serebbi da sciarballila in faccia, a so caffittera : avà so obblicatu per cuntrattu, tutta a mo vita, di cumprà  u caffè di marca Nescroccu. Ghjè a lege. Da poi chì Valls hè venutu à fà a guerra à a grande delinquenza, a ligna gialla ùn si pò più francà. Mancu per una caffittera. Hà ragiò Valls di mettesi in zerga. Ci vole à luttà contru à l’aumentu di a  « recrudescence ».