Masai: E tripette
Messagiu subliminale
Sò spiritu legeru è polpa pisia
Ma soca hè dinamicu u squilibru
A disse issa verita un qualchissia
A scrisse ancu in un famosu libru
Per contu meo è pè e cose dette
Eo, e dicu cù e trippette
Incù elle sò e belle chjachjerate
Tutte belle cundite è di sennu astutu
À ch’ùn vole assaghjà à ch’ùn ne pò pate
A si chjodi una stonda è si stia mutu
Per contu nostru è per ogni cosa detta
Noi a dimu incù a trippetta
Tanti viaghji portanu a stintina
Arangiata in Tuscana, à a Bastiaccia
Di Caen, di Marseglia o à l’Aiaccina
Tedesche, Irlandesi, di Bastelicaccia
E trippe e licchemu ancu nant’à e tette
Noi e cosi e dimu incù e trippette.
Tempu d’elezzioni è di musarola
Ùn collinu à gallu l’idee immerse
E stondi felici quà ghjò in Ficaghjola
E stonde di prima e zitelline perse
Allora cuntentemuci pè e cose dette
Di dille solu incù e trippette
Certi e facenu in pedi è in pachetti
E pinzute dumandanu a carotta
E dilicate mettenu i spechjetti
L’intimuriti volenu a capotta
Un tale dice “quand’o e sentu trincu
Chì ùn sò mai à bastanza pulite”
Un altru ùn ne manghjà ma chè cù u schincu
Pè i rompistacche sò troppu salite
Basta, chì avà facciu u ballu di l’orsu
Piantu puru quì u picculu discorsu
In tempu d’elezzioni è pè e cose dette
Eo, e dicu cù e trippette