Masai: A cascia è a bacascia

Un colpu à u chjerchju, un colpu à a botte, ghjè a filusifia di serviziu publicu in giurnalismu. U guerrieru Masai a mette in opera. Oghje, avia appruntatu un discursettu nant’à u “campà inseme”. A sapete chì, dopu à l’attentati islamisti di Parigi, di Copenhaga è d’altrò, issu tema hè riprupostu è reinterpretatu. Ma finalmente, vene à imponesi una dumanda in urgenza, d’una pertinenza più forte:

E carzette di l’archiduchesse,  sò secche o ùn sò secche ?

A ci facianu amparà quessa a quistione quand’è no studiavamu u mistieru di giurnalistu. Mi dicia tandu chì, forse, per un giurnalistu di u serviziu publicu, deve avè una certa impurtanza tantu a dumanda chè a risposta. A ci facianu ripete ore sane, purtantu risposta mai ci n’era. Ùn aghju mai avutu l’occasione di ponela à un omu puliticu, issa dumanda ch’elli ci anu amparatu insistendu tantu, quant’è s’ella era a mamma di tutte e quistioni..

Puru s’eo mi n’enfuttu, oghje, finalmente, di sapè sì e carzette è di l’achiduchesse sò secche o ùn sò secche, mi vene cum’un gridettu di rivolta.

Ancu ancu s’elle eranu e carzette di Lady Chatterley... E carzette di Lady Chatterley, issa bartulona, chì a sapemu tutti perchè ch’elle sò bagnate. Ancu ancu s’elle eranu  e carzette di Trierweiler, ch’ùn si ne parla più. E carzette di Madama Trierweiler seranu secche o ùn seranu secche, da poi u tempu ch’ella hè smarita da i radar di l’attualità ? Aghju paura chì e carzette di Madama Trierweiler sianu secche è trasecche. Ùn capiscu perchè chì, un giurnalistu di u serviziu pubblicu si deva primurà di issi bucati intimi.

Micca chì, quand’è v’andate ind’è dentistu è chè v’aspettate. Avete lettura chì v’hè pruposta nant’à u tavulinettu. Ci hè le Figaro Magazine, Voici, Le Nouvel Obs, Corsica, U Ribombu, Valeurs Actuelles è Arritti. Cosa pigliate ? Ditela franca. Pigliate à Voici chì vi prupone e fottò di a lufuaccia di l’archiduchesse spugliata è quella di e so carzette bagnate, appiccate à u filu. È vi piace.

A mamma di tutte e quistioni, simu noi omi chì l’emu scritta. Simu noi chì a punimu è ùn aspettemu risposta. Cosa ci interessa ? U campà inseme o e carzette di l’archiduchesse?

Ùn truveremu risposta, tandu chì u nostru solu dilemma in testa serà: parte incù a cascia o parte cù a bacascia ?