Masai : Arlechini è arlechinate
E botte è e pantufule
Arlechini è arlechinate. I présidenti sbaccavesta si sevutanu è s’assumiglianu. Vi ricurtate di Sarkozy, chì incù e so bracciuccie è e so anche corte, piglendusi per Zorru, s’hè rivelatu zeru. Hollande ci ghjoca listessu filmu.
« Aiò tutti, andemu à bumbardà u dittatore, a Francia parte in testa, alè, alè iuuuuu uuu », hà mughjatu cum’un scemu un mese è mezu fà. Ma chì l’hè chjappu ? Sentendulu, Obama chì parla prima è riflette dopu –in fatti si ne impippa-, hà gridatu. « Vengu ancu eo, Vengu ancu eo ». À u sente di issu trostu, l’Inglese Cameron chì vulia esseci in issa prumessa festa, li dà una voce « aspettatemi, vengu ancu eo, vengu ancu eo, iu uuuuu ». È Hollande, videndusi sceffu in issa « guerre des boutons les dictateurs dehors », parte in testa. Si tene appesu in manu un sacchettu di plasticu, incu e so quattru bombe nentru. « Aiò andemu à bumbardà, iuuuu uuuuu ! ». È si mette à corre incù e so ancuccie chjuche chjuche. Solu, chì pocu dopu, l’inglese u chjama : « eù, finalmente ùn vengu micca, sai, aghju una pena quì, à a camera di i deputati ». Ma Hollande cuntinueghja « iuuu andemu à bumbardà ! ». Pocu dopu Obama u chjama. « Sai eo, ùn hè sigura ch’eo venga, aghju tante faccende u tempu m’hà da mancà… »…
È Hollande s’hè trovu à palle in manu, solu solu, e so quattru bombe in u so sacchettu di plasticu, incù i so Michoko pè a merenda..
Chì disordine o ghjente. Ci serebbi un solu dirittu internaziunale da rispettà è da fà rispettà : quellu di a cummunità di e naziuni addunita in l’ONU. Per altru, i cunflitti ùn anu bisognu di a Francia per esse risolti, ma di l’Europa. D’una Europa chì esisterebbi in veru, per fà da contrapesu à i Stati Uniti, a Russia, a Cina. Ma per avà, l’Europa s’hè sempre un nannulu in u cuncertu internaziunale, è a Francia ancu peghju, un nannulu è mezu. L’arlechinate di i so presidenti ùn l’anu da ingrandà.
È à noi, populu, ùn ci ferma chè à sceglie trà e stacchitate di e botte di i dittatori è u dolce strufinà di e pantufule, nant’à e sulaghje di quelli chì i lascianu fà.