L'horoch'ti du samedi 6 février

Arrêtes ed’ foncer comme cha tiête abachée BELIER… Poses-te,… busies un monet,… et te pourras pét’ ête arpartir d’un bon pied… !

TAUREAU, te vas t’ ployer in quate pour arriver à tes fins et cha va réussir… incore deux tros jours comme cha et cha va t’ête l’ extase… !  

Pour el’ bien ed’ tin ménage, GEMEAUX, prinds un monet d’ arcul…O z’êtes toudis dins les gambes ed’ l’ un l’ aute… alorss prénez chacun un monet d’ liberté et tout i va s’arringer… !

Ti, CANCER, te sortes tout juss’ et’ tiête de l’ ieau… Mais méfies’te… i n’a des qui pourrot’tent bin rappoyer d’ zeur… te n’as point qu’ des comarats… !

En’ fais point trop d’ zèle, LION, ou cha pourrot bin s’ateurner cont’ ti… N’ oblie jomais que l’ miux, ch’ est l’ ennemi du bien… !

Prinds les évèn’mints à vénir aveuc philosophie, m’ tiote VIERCHE, Soè pachiente, cheulle reule alle va bin finir par teurner un jour… !

Ch’ est bien d’ réussir dins la vie, BALANCHE, mais ch’ est incore miux si qu’ in fait cha in restant honnête…pinses z’ y… !

T’ es par trop généreux SCORPION, mais à forche d’ête trop gentil, te vas passer pour un babache, à ti d’ vire… !

Te convoites l’ impossible, SAGITTAIRE, …A m’ n’ avis, te devros vite t’ armette in question, ou te vas aller drot dins ch’ mur… !

CAPRICORNE, te vas drot vers un tournant de t’ vie sans précédant… Abordes cha l’ pus duch’mint possipe… cha s’rot biête ed’ rater un si biau virache… !

VERSEAU, t’ as quiqu’ z’ affaires z’ urgentes qui sont restées in route, mais cha n’a point l’air ed’ t’armuer gramint… cha attindrot lundi qu’ cha n’ m’étonn’ros qu’ à mitant …!

Et infin, PICHON, t’ as quequ’ z’ obstaques qui s’ drèch’tent pad’vant ti, mais comme te n’as franchi des dix fos plus grands, cha n’est point chéllalles qui vont t’ faire peur… 

Allez, à d’main mes gins et bon week-en !