L'horoch'ti du mardi 9 février
Allez mes gins, ténez-bon, vous aussi , in va s’ in sortir… !
Te sautes à l’ clinche, BELIER, mais par conte, te vas t’ête aussi capape ed’ querre dins les bras de ch’ premier vénu… et cha va faire ed’ z’ étinchelles… !
La vie alle est presque belle, TAUREAU, …T’as querre et’ mason, eune bonne bistoulle, et’ femme, et’ n’auto, t’aros un monet d’ sous in plus, equ’ cha s’rot l’ paradis…
GEMEAUX, ti qu’ te sais arringer les affaires, cha va grand’mint t’ servir aujord’hui pour raccomoder des comarats à ti qui étot’tent in bis-broulle… Bravo min loute…
T’as d’ mau à t’ faire comprinde CANCER, mais pét’ête aussi qu’ te t’essprimes comme un manche… arrêtes ed’ bèguer, cha ira miux …!
Te multiplies les contacts, LION, mais cha n’est point pass’qu’i n’ a gramint qu’ ch’est tertous des bons… tries et conjis bien, sinon, garre aux seurprisses …!
VIERCHE, t’ es in route à prinde eune direction qui vas t’ mèner tout drot au bonheur… en’ canges point et tout ira pour el’ miux… !
Te négliges et’ famill’, BALANCHE…J’ sais bin qu’ t’es accouf’té d’ traval, mais faut partager :…eune cueillère pou’ tin patron, eune cueillère pour et’ mason …sinon… !
T’as tin moral dins tes cauchettes SCORPION, et chés jours-chi n’vont rin t’apporter d’ bon… r’mets-te vite in selle, ou té vas bourler à l’ première hayure…!
T’as querre tin partenaire, SAGITTAIRE, mais in même timps, in dirot qu’ te n’ as peur comm’ ed’ la peste… parles z’in aveuc li , cha éclairchira pét’ête l’ atmosphère… !
Chés CAPRICORNES ed’ déchimpe, i nag’tent dins l’ bonheur, par conte, chéllales ed’ janvier i z’ont quiqu’ problèmes ed’ sous mais pus pour longtimps … !
VERSEAU te vas r’chuvoèr des ordes qui vont t’ faire bouillir… Alorss, sot qu’ t’ obéis, sot qu’ t’ obéis point… fais cha à pile ou face… ed’ toute façon, des deux côtés, ch’est ti qui va pâtir …!
Et infin, en’ te laiches point aller comme cha PICHON, Prinds sur ti rountidiu… si te t’ laiches aller t’es foutu…
Allez, à d’main mes gins, ténez-bon, vous aussi , in va s’ in sortir… !