L'horoch'ti du lundi 15 février de José Ambre

Te n’ a point trop l’ moral, BELIER, el moindre tiote blublutte, cha va t’ arteurner les sangs… attinds d’main, ch’ vint i va tourner… !  

Ti, TAUREAU, te n’ tiens pus à plache, et i n’a des qui vont profiter de t’ n’énergie, mais i n’a d’ autes equ’ te vas user, aussi… !

Mais pourquo qu’ te t’ tracasses comme cha, GEMEAUX, …Te t’in fais gramint trop pour el’ z’autes, té devros plutôt pinser à ti et cha irot miux… !

CANCER, t’ acumonchelles gramint trop d’ responsabilités, ti,…Alorss raccroches-te à chés branques, cha n’ est point l’ momint d’ lacher priss’ ou té vas t’ casser tin nez …!

LION, t’ as l’ sommeil léger et les matins i sont plutôt dur-durs…Un consel : un monet de sport dins l’ jour,  eune tiote tisane au soèr, et cha devrot s’arringer vite fait… !

VIERCHE, arrêtes ed’ vire systématiqu’mint ch’ verre à mitant vuide…Si i-est à mitant vuide, ch’est qu’i-est à mitan plein aussi, alorss arringes-te pou’ l’ rimplir complèt’mint et tout ira bien…

BALANCHE, te t’ laiches par trop aller aux délices ed’ l’ amour, ti.. Attintion quand même , à vif’ ainsin d’amour et d’iau fraîque, té vas dev’nir tout à rien et cliquer à z’oches, t’es prév’nu…!!

SCORPION, tout i va aller pour el’ miux pour ti,  et te vas tout faire pour equ’ cha dure…Roule ma poule… !

Din tin traval, SAGITTAIRE, cha n’ est vraimint point l’ bonne entente… Mais comm’ t’y peux rien, fais bien t’ nouvrache et t’occupes point du ress’…in pourra rien t’arprocher.. ! 

CAPRICORNE te c’mminches cheulle sémaine chi aveuc un rude entrain, ti…Mais bon, en’  breules point chi tous tes cartouches d’ un seul coup, gardes z’in quiqu’ z’ eunes pour la fin… !

Ress’ simple et ress’ ti-même, VERSEAU… A vouloèr péter plus haut qu’ sin cul, in risque fort de s’ faire un tro au mitant du dos… !

Et infin, PICHON, t’ as quiqu’ z’ affaires à régler, mais fais cha in ayant eune bonne conversation… s’énerver pour si peu n’ arring’rot rien…

Allez, à d’main mes gins, et bon début d’ sémaine…