L'horoch'ti de ce mardi 2 novembre

BELIER, te vas taquiner tertous autour ed’ ti, et te vas même n’in faire un monet d’trop pour épater tes gins…alors, si qu’ te n’ in prinds eune su’ tes loupes, en’ viens point braire ichi … !

Ach’ matin, TAUREAU, té s’ros bin resté à jouque…Mais bon, i faut bin faire bouillir el’ marmite hein, alors si qu’ té veux minger, va bien falloèr aller œuvrer …!

 Aujourd’hui, GEMEAUX, te vas passer t’ jornée à parler haut et fort… Heu…n’in fait point d’ trop quand même, ou te vas saôuler tin monde… !  

In ch’ momint, CANCER, y-a qu’ tin tiot monde à ti qui compte… Alors gare à ch’ti qui varrot mett’ sin nez dù qu’i n’y-a point d’ ieau pour  el’ laver… i va s’ aire épourer…!

Alorss ti, LION, t’ es au « top » aujord’hui… te vas treuver eune banse d’ astuces pour régler vite fait bien fait tous tes problèmes….Cha t’ a fait du bien ed’ t’ arposer tros jours… !

VIERCHE, t’ as t’ tiête dins ch’ guidon et t’ n’ ouvrache i avinche à l’ vitesse grand « V »… Hé ben..in peut dire equ’ tin patron i-a vraimint eune chance du diape ti z’ aute…!

Ti qu’ es si calme d’ habitute, BALANCHE, t’ vala toute émoustillée… T’es tout in fouffielle, et te pouros bin  ête tinté par quet’cosse ed’ nouviau…Hooo, y-a inguille sous roche… !

T’ esselles ed’ t’in sortir par tous les moyens SCORPION… Mais attintion, tous les coups i n’ sont point permis et si qu’ te raques in l’air, cha pourrot bin t’ arquèrre su’ tin nez …!

T’ as invie d’ liberté SAGITTAIRE, et t’ es prêt à partir drot pa’ d’vant ti …Attintion quand même, hein, te sais chou qu’ t’as, mais point chou qu’ te vas treuver … !

T’ as l’ impression qu’i-a rin qui va CAPRICORNE, mais cha n’ est qu’ eune impression..Patienche, …té n’ fais qu’arculer pour miux sauter et tout i va s’ arringer…!

Calmes-te et prinds tin temps VERSEAU…Va falloèr equ’ te prinche eune décision importante, et cha n’est point l’ momint de t’ berlurer …!

 Et infin, PICHON, in t’ demande ed’ partoute pou’ donner des coups de mains…Ch’ est bin joli tout cha, mais va falloèr apprinde à dire non, hein, ou in va vite et’ printe pour un babache