Les informations en langue bretonne
Chomet eo serret marc'had Nedeleg Strasbourg, goude ez eus bet tennet war an dud a oa o pourmen e-kichen ar staligoù, dec'h gant un den. Klasket e vez c'hoazh war e lerc'h gant ar boliserien.
Aet eo an enklask war-raok hiziv. Anavezet e oa gant ar boliserien an den a zo diskred warnañ bezañ lazhet tri den, e Strasbourg, ha gloazet 12 den all o tennañ warno.
Gwalldaol Strasbourg e penn an dud war marc'hadoù ar vro
Er vro e oa digor ar marc'hadoù Nedeleg. E Brest eo bet kreñvaet ar muzulioù surentez : furchet e vez e-barzh seier an dud a fell dezho mont war plasenn ar Frankiz, ha div wech muioc'h a dud a ve oc'h ezvezañ ar marc'had. E Kemper eo bihanoc'h c'hoazh ar marc'had, met evel-just e oa gwalldaol Strasbourg e penn an dud, a gont deomp Bruno.
Marc'had Nedeleg Plougerne a vo dalc'het memes tra
Met arabat pennfolliñ, dav eo kenderc'hel da vevañ, hep ankounac'haat pezh a zo c'hoarvezet, eme Yannig Robin, maer Plougerne. N'eo ket ankeniet evit marc'had Nedeleg e gumun, a vo a-benn ur sizhun hanter.
An ti-post a ra war-dro ar re gozh
Abaoe ur bloaz hanter ez eus bet lañset ur servij nevez gant an ti-post : "Veiller sur mes parents" e anv, kinnig a ra d'an dud paeañ evit ma teuio paotr pe blac'h al lizhiri da dremen amzer gant tud kozh. Heuliet en deus Léo Roze ur weladenn e Sant Wazeg.