Les informations en langue bretonne
Komzet e oa bet ganeomp diwar-benn manifestadegoù ar gargidi, diwar-benn ar gartenn skol nevez, ha diwar-benn forom an implij e brezhoneg a oa bet dalc'het e Landerne.
Harzh-labour : penaos ober hep trenioù ebet ?
War-sav e vo ar gargidi hag an dud kar ouzh ar servijoù publik d'ar 22 a viz Meurzh. Dibunet e vo ivez e straedoù ar vro gant ar cheminoted. N'eo ket ar wech diwezhañ dezho mont da vanifestiñ. Kroget int gant ur stourm war an hir-dermen a-enep da reform an SNCF a zo kaset war-raok gant ar gouarnamant. Diaes e vo en em aozañ evit beajourien boaz da gemer an tren. Selaouit soñj Lara ha Guilvic a zo boaz da vont deus Brest da Landerne just awalc'h.
Ur gartenn-skol 2018 "mantrus" evit Div Yezh Breizh
Hegaset mat eo izili ar gevredigezh Div Yezh Breizh, a vod kerent ar vugale en hentennoù divyezheg publik. Studiet pizh o deus ar gartenn-skol evit an distro skol a zeu hag hervezo ne vez ket doujet gant ar rektordi ouzh an emglev bet sinet e 2017 diwar-benn diorroadur an divyezheg publik. Gant Rémi Toulhoat, prezidant ar gevredigezh Div Yezh Breizh
Forom an implij e brezhoneg
Dalc'het e oa bet en abardevezh-mañ forom an implij e brezhoneg e Landerne. Ar pempvet gwech e oa da Stumdi, ar greizenn stummañ, aozañ seurt darvour. Kinniget e oa bet micherioù a bep seurt d'an dud oc'h ober ar stummadur. Reportaj Tara Lagoutte.